कतारमा जारी विश्वकपअन्तर्गत समूह चरणको पहिलो खेलमा अर्जेन्टिनाविरुद्ध ऐतिहासिक जित निकालेपछि साउदी अरेबियाका राजा सलमान बिन अब्दुलाजिज अल साउदले खुसियाली मनाउन एकदिने सार्वजनिक बिदाको घोषणा गरेका छन् ।
साउदीले मंगलबार विश्वकपमा समूह ‘सी’ को खेलमा अर्जेन्टिना विरुद्ध २ – १ को ऐतिहासिक जित निकालेको थियो । साउदीले विश्वकपमा पहिलोपटक अर्जेन्टिनाविरुद्ध जित निकालेको हो ।
खेलमा साउदीले १-० ले पछि परेको अवस्था उल्ट्याउँदै २-१ को जित दर्ता गरेको थियो । लियोनल मेसीले पेनाल्टीमा गोल गर्दै अर्जेन्टिनालाई अग्रता दिलाए पनि दोस्रो हाफमा सालेह अल सेहरी र सलिम अल ड्वसारीले गोल गरेपछि साउदीले जित पक्का गरेको थियो ।
“बुधबार सबै क्षेत्रका पुरुष, महिला कामदार, शैक्षिक क्षेत्रका विद्यार्थी र सबै निजी क्षेत्रमा भोलि सार्वजनिक बिदाका लागि निर्देशन जारी गरिएको छ,” साउदीको आधिकारिक ट्विटर ह्यान्डलमा लेखिएको छ ।
