गढवा २२ श्रावण । क्रियटिङ पोसिबिलिटिज नेपाल (सीपी नेपाल) ले आर्थिक वर्ष २०८१/८२ को वार्षिक प्रगति समीक्षा, सार्वजनिक सुनुवाइ तथा आर्थिक वर्ष २०८२/८३ का योजना र बजेट सार्वजनिक गरेको छ ।
लमहीस्थित होटल ग्रीन लुम्बिनीमा आयोजित कार्यक्रममा संस्थाले विगत वर्षका उपलब्धिहरू तथा आगामी वर्षका रणनीति सार्वजनिक गर्दै शिक्षा, स्वास्थ्य, महिला सशक्तिकरण, उद्यमशीलता र सामाजिक रुपान्तरणमा केन्द्रित कार्यक्रमहरू प्रस्तुत गरेको हो ।
कार्यक्रमको अध्यक्षता जिल्ला समन्वय समिति दाङका प्रमुख नित्यानन्द शर्माले गर्नुभएको थियो। उहाँले सीपी नेपालले पछाडि पारिएका वर्गका लागि शिक्षा, सीप, आत्मबल र चेतनाको विकासमा पुर्याएको योगदानको प्रशंसा गर्दै यस्ता संस्थाहरूको भूमिका अत्यन्तै महत्वपूर्ण हुने बताउनुभयो ।
गाउँपालिका प्रमुखहरूको तर्फबाट राप्ती गाउँपालिका अध्यक्ष प्रकाश विष्टले संस्थाको कार्यक्रमहरू रचनात्मक र प्रभावकारी भएको उल्लेख गर्दै ‘एक विद्यालय, एक उद्यम’ कार्यक्रमको अवधारणा अघि बढाउन सुझाव दिनुभयो ।
उपाध्यक्षहरूको तर्फबाट बोल्दै राजपुर गाउँपालिकाकी उपाध्यक्ष धनपतिदेवी यादवले संस्थाले स्थानिय आवश्यकता पहिचान गरी स्थानीय सरकारसँग सहकार्यमा कार्यक्रम सञ्चालन गर्दै आएको र शिक्षा क्षेत्रमा थप लगानी आवश्यक रहेको धारणा राख्नुभयो ।
त्यस्तै, गढवा गाउँपालिका–५ का वडाध्यक्ष लेखबहादुर थापाले संस्थाले शिक्षामा गरेको लगानी अतुलनीय रहेको बताउँदै अब वितरणमुखी कार्यक्रमको अन्त्य गरेर दिगो प्रभाव पार्ने कार्यमा केन्द्रित हुनुपर्ने सुझाव दिनुभयो ।
सार्वजनिक सुनुवाइका क्रममा विभिन्न विद्यालयका प्रध्यानाध्यापकहरूले शिक्षा प्रणालीलाई बालमैत्री र प्रविधिमैत्री बनाउने खालका लगानी र कार्यक्रमहरू आवश्यक रहेकोमा जोड दिए ।
संस्थाका कार्यक्रम संयोजक हेमराज शर्माले आर्थिक वर्ष २०८१/८२ को कुल बजेट ८ करोड १९ लाख ५३ हजार १०१ रुपैयाँमध्ये ७ करोड ९६ लाख ८७ हजार ५७६ रुपैयाँ खर्च गरिएको जानकारी दिनुभयो। आगामी आर्थिक वर्ष २०८२/८३ का लागि अनुमानित बजेट ६ करोड ९४ लाख ३६ हजार ९७९ रुपैयाँ रहेको जानकारी गराउनुभयो ।
कार्यक्रममा संस्थाका कार्यक्रम अधिकृत हेमराज शर्माले संस्थाको कार्यक्रम तथा बजेटको बारेमा जानकारी गराउनु भएको थियो । यस क्रममा संस्थाबाट लाभान्वित तर्फबाट पुजा चौधरी, जानकी रोकाय र मिना चौधरीले संस्थाले गरेका कामहरुको प्रशंसा, उहाँहरुको जिवनमा पारेका सकारात्मक प्रभाब तथा मार्गनिर्देशनको बारेमा जानकारी गराउनु भएको थियो ।
क्रियटिङ पोसिबिलिटिज नेपालले २०६४ सालदेखि गढवा, राजपुर र राप्ती गाउँपालिकामा शिक्षा, स्वास्थ्य, कृषि र महिला सशक्तिकरणमा क्रियाशील रूपमा काम गर्दै आइरहेको छ ।
कार्यक्रममा गढवा गाउँपालिका अध्यक्ष यमनारायण शर्मा पोख्रेल, उपाध्यक्ष शारदा चौधरी, राजपुर गाउँपालिका अध्यक्ष शरदकुमार बुढाथोकी, राप्ती गाउँपालिका अध्यक्ष प्रकाश विष्ट, प्रमुख प्रशासकीय अधिकृत कृष्णप्रसाद पौड्याल, इलाका प्रशासन कार्यालय लमहीका शाखा अधिकृत, तीनवटै पालिकाका विभिन्न वडाध्यक्षहरू, शिक्षक, विद्यार्थी, विभिन्न संघसंस्थाका प्रतिनिधि, महिला समूहका सदस्य, पत्रकारलगायतको उल्लेखनीय उपस्थिति रहेको थियो ।
कार्यक्रममा गढवा वडा नं. ६ का वडा सदस्य दिनामणी आचार्य, जनता माविका प्रध्यानाध्यापक रामसुरत यादव, शुभतारा बोर्डिङ स्कुलका प्रध्यानाध्यापक विकास रजौरे, गढवा गाउँपालिकाका प्रेस संयोजक आलोक भावुकलगायतले धारणा राखेका थिए ।
कार्यक्रमको संचालन संस्थाकी महिला सशक्तिकरण संयोजक सरिता चौधरीले गर्नुभएको थियो भने, स्वागत मन्तव्य विद्यार्थी सशक्तिकरण संयोजक दीपा चौधरीले राख्नुभएको थियो ।
