दाङ २८ साउन । दाङको राप्ती गाउँपालिकामा रहेको राप्ती चेम्बर अफ कमर्स मातहत युवा चेम्बर अफ कमर्सले बुधबार राप्ती गाउँपालिका-५ सिसहनियाँ खुल्ला रक्तदान सँगै निशुल्क विशेषज्ञ स्वास्थ्य शिविर सम्पन्न गरेको छ ।
२६ औं अन्तराष्ट्रिय युवा दिवसको अवसर पारेर युवा चेम्बरले शिविर सञ्चालन गरेको हो । पैसा अभावका कारण उपचार गराउन नसक्ने अवस्था भएका गरिव तथा विपन्न नागरिकहरूलाई लक्षित गरि शिविर सञ्चालन गरेको युवा चेम्बर अफ कमर्सका अध्यक्ष मोतीराम भट्टराईले जानकारी दिनु भयो ।
राप्ती गाउँपालिकाको आर्थिक सहयोग तथा आध्या मेडिकल हल सिसहनियाँ र नेपाल रेडक्रस सोसाइटी रक्त सञ्चार सेवा केन्द्र लमहीको प्राविधिक सहयोगमा शिविर सञ्चालन गरिएको हो । स्वास्थ्य शिविरबाट २ सय ३० जना बिरामीहरूले सेवा लिएका थिए । जसमा नशा तथा हाडजोर्नीका समस्या भएका १ सय ४० जना बिरामी र महिला समस्या भएका ९० जना बिरामीले सेवा लिएका थिए ।
त्यस्तै शिविरमा विभिन्न क्षेत्रका २४ जनाले रगत दान गरेका थिए । शिविरको उद्घाटन राप्ती गाउँपालिकाका अध्यक्ष प्रकाश विष्टले गरेका थिए । शिविर उद्घाटन समारोहमा बोल्दै अध्यक्ष विष्टले रगत अभाव भइरहेका बेला युवा चेम्बरले अनुकरणीय काम गरेको बताउनु भयो । अध्यक्ष विष्टले सरकारले केही गरेन भन्नेहरूलाई निजी संस्थाले समेत साथ र सहयोग गरेको बताउनु भयो । युवा चेम्बर अफ कमर्सका प्रथम उपाध्यक्ष पदम परियारको स्वागत मन्तव्यबाट सुरू भएको शिविर उद्घाटन कार्यक्रममा नेपाल चेम्बर अफ कमर्स लुम्बिनी प्रदेश सदस्य शंकर गाैतम, राप्ती गाउँपालिका वडा नम्बर ५ का वडा अध्यक्ष देवप्रसाद चाैधरी लगायतका वक्ताहरूले शुभकामना मन्तव्य व्यक्त गरेका थिए ।
स्वास्थ्य शिविरमा नशा तथा हाडजोर्नी रोग विशेषज्ञ डा. निरज केसी र महिला रोग विशेषज्ञ डा. विनय पाण्डे र स्वास्थ्यकर्मीहरू सुदन घिमिरे, शान्ता खनाले सेवा दिएका थिए । भने रक्तदान तर्फ रक्त सञ्चार सेवा केन्द्र लमहीका प्रमुख सिमा वली र प्राविधिकहरू विष्णा पोख्रेल, झरना चाैधरीले सेवा दिएका थिए । कार्यक्रमको सञ्चालन चेम्बरका प्रेस सल्लाहकार ओमप्रकाश गुप्ताले गर्नु भएको थियोे ।
