मसुरीया ३१ साउन । राप्ती गाउँपालिकाले आर्थिक वर्ष २०८१/८२ को वार्षिक प्रगति समीक्षा कार्यक्रम शुक्रबार सम्पन्न गरेको छ । गाउँपालिकाका अध्यक्ष प्रकाश विष्टको अध्यक्षतामा भएको कार्यक्रममा विभिन्न शाखा र वडाहरूले वर्षभर गरेका कार्य तथा उपलब्धिहरू प्रस्तुत गरेका थिए ।
कार्यक्रममा अध्यक्ष विष्टले योजनाहरू सफलतापूर्वक कार्यान्वयनमा गाउँपालिकावासी, जनप्रतिनिधि, कर्मचारी तथा सरोकारवाला निकायको सहयोगप्रति आभार व्यक्त गर्दै धन्यवाद ज्ञापन गर्नुभयो । उहाँले शिक्षा, स्वास्थ्य, कृषि तथा युवा उद्यमशीलता जस्ता क्षेत्रमा पालिकाले उल्लेखनीय प्रगति गरेको बताउनुभयो ।
“जनताको विश्वासलाई केन्द्रमा राखी हरेक योजनामा पारदर्शिता र सहभागितालाई प्राथमिकता दिएका छौं,” अध्यक्ष विष्टले भन्नुभयो, “स्थानीय सरकारको मूल जिम्मेवारी जनताको सेवा हो, जसलाई हामी सबै मिलेर अझ प्रभावकारी बनाउँदै लैजानेछौं ।” उहाँले सेवा प्रवाहलाई पारदर्शी, गुणस्तरीय र उत्तरदायी बनाउन विशेष ध्यान दिन कर्मचारीहरूलाई आग्रह गर्नुभयो ।
त्यस्तै, प्रमुख प्रशासकीय अधिकृत देविराम पाठकले नतिजामुखी सेवा प्रवाह, स्रोतको सही उपयोग र जनसहभागिताको सन्तुलनमा जोड दिनुभयो । उहाँले कर्मचारी र जनप्रतिनिधिबीचको आपसी विश्वास र सहकार्यबाट मात्रै समृद्ध गाउँपालिका निर्माण सम्भव हुने विश्वास व्यक्त गर्नुभयो ।
विभिन्न सूचकका आधारमा मूल्यांकन गर्दा वडा नं. २ प्रथम, वडा नं. १ द्वितीय र वडा नं. ४ तृतीय भएका छन् ।
कार्यक्रममा कार्यपालिका सदस्य, वडाध्यक्ष, शाखा प्रमुख, वडा सचिव, अन्य कर्मचारी तथा सञ्चारकर्मीहरूको उपस्थिति थियो। कार्यक्रममा सहजीकरण शिक्षा, युवा तथा खेलकुद शाखा प्रमुख तथा सूचना अधिकृत विश्वास विकले गर्नुभएको हो ।
यसै बीच राप्ती गाउँपालिकाले आर्थिक वर्ष २०८१/८२ मा स्वीकृत कुल बजेटको ८६ दशमलव ५१ प्रतिशत खर्च गरेको छ ।
कुल ६४ करोड ५३ लाख ३६ हजार रुपैयाँ स्वीकृत बजेटमध्ये ५६ करोड ९८ लाख ७४ हजार रुपैयाँ प्राप्त भएको थियो । यसमध्ये ५५ करोड २६ लाख ४४ हजार रुपैयाँ खर्च भएको गाउँपालिकाले जनाएको छ । लुम्बिनी प्रदेश सरकारबाट प्राप्त ३ करोड १३ लाख १५ हजार रुपैयाँमध्ये ३ करोड ६ लाख ६२ हजार रुपैयाँ अर्थात् ९७ दशमलव ७१ प्रतिशत खर्च भएको छ । संघीय सरकारबाट प्राप्त ३३ करोड २२ लाख ३ हजार रुपैयाँ अनुदानमध्ये ३२ करोड ३४ लाख २ हजार रुपैयाँ अर्थात् ९७ दशमलव ३५ प्रतिशत खर्च भएको छ ।
आन्तरिक आम्दानीबाट ४ करोड ९९ लाख ७५ हजार रुपैयाँमध्ये ४ करोड ७१ लाख ११ हजार रुपैयाँ अर्थात् ९३ दशमलव ४९ प्रतिशत खर्च भएको छ । त्यस्तै, राजस्व बाँडफाँडबाट प्राप्त १५ करोड ७० लाख ७१ हजार रुपैयाँमध्ये १५ करोड २४ लाख ६९ हजार रुपैयाँ अर्थात् ९६ दशमलव ४३ प्रतिशत खर्च भएको छ ।
