देउखुरी ११ भदौ । हरितालिका तीजको अवसरमा नेकपा माओवादी केन्द्र निकट अखिल नेपाल महिला संघ (क्रान्तिकारी) राप्ती गाउँपालिका कमिटीले आगामी भदौ १३ गते तीज विशेष कार्यक्रमको आयोजना गर्ने भएको छ ।
संघले महिलाहरुको सांस्कृतिक, सामाजिक र धार्मिक पहिचानलाई उजागर गर्दै उनीहरुबीच एकता र सद्भावलाई बढावा दिन कार्यक्रमको आयोजना गर्न लागेको संघकी अध्यक्ष दुरपती चाैधरीले जानकारी दिनुभयो ।
कार्यक्रममा महिलाहरुले परम्परागत भेषभूषामा सजिएर तीजका गीतमा नाचगान गर्ने, सामूहिक दर खाने र विभिन्न सांस्कृतिक प्रस्तुति दिने कार्यक्रम तय गरिएको छ ।
त्यस्तै कार्यक्रममा महिलाहरुको सशक्तिकरण, समानता र अधिकारको प्रवर्द्धनका विषयमा पनि छलफल हुने अध्यक्ष चाैधरीले बताउनुभयो ।
राप्ती गाउँपालिका वडा नम्बर २ बराखुटी स्थित करम्दी सामुदायिक वन उपभोक्त समितिको भवनमा बिहान १० बजेदेखि सुरु हुने उक्त कार्यक्रममा सहभागी भएर आफ्नो संस्कृति र परम्पराको जगेर्ना गर्न संघकी अध्यक्ष चाैधरीले पालिकाबासी सम्पूर्ण महिलाहरुलाई आग्रह गर्नु भएको छ ।
त्यस्तै कार्यक्रमले महिलाहरुबीच आपसी एकता र भाइचारा बलियो बनाउने विश्वास गरिएको छ । कार्यक्रममा विभिन्न समाजसेवी, राजनीतिकर्मी र स्थानीय नेतृहरुको उपस्थिति रहने बताइएको छ ।
