बाजुराको त्रिवेणी नगरपालिका ७ स्थित दम्था मदतानस्थलबाट प्रहरीको इन्सास राइफल लुटिएको छ । गोली लोड गरिएको राइफल मतपेटिका लुट्न आएकै समूहले खोसेर लगेको र अझैसम्म फेला नपरेको प्रहरी प्रवक्ता एसएसपी दानबहादुर कार्कीले बताएका छन् ।
सोही मतदानस्थलमा मतपेटिका लुट्न खोजिएपछि सुरक्षाकर्मीले चलाएको गोली लागेर अन्दाजी २५ वर्षीय सञ्जिव अएडीको मृत्यु भएको थियो । मतपेटिका खोस्न आएको समूहलाई रोक्न खोज्दा भीडले ढुंगा हानेपछि घाइते भएका प्रहरी सहायक हवल्दार कृष्णबहादुर कुँवरको साथमा रहेको लोड गरिएको राइफल लुटिएको प्रहरीले बताएको छ । हतियार लुट्नेहरुको खोजी भइरहेको प्रवक्ता कार्कीले बताए ।
यस घटनामा प्रहरी हवल्दार कृष्ण कुँवरसहित तीन जना घाइते भएका छन् । घाइते हुनेमा स्थानीय पर्शुराम पाध्याया र खडक अएडी छन् । घाइते भएका दुई स्थानीयलाई नेपाली सेनाको हेलिकोप्टरबाट काठमाडौं लगिएको छ ।
स्थानीयले मतपेटिका खोस्न खोज्दा उत्पन्न विवादपछि झडप हुँदा प्रहरीले हवाइ फायर गरेको थियो ।
