भालुबाङ । लुम्बिनी प्रदेश दाङ देउखुरीको राप्ती गाउँपालिका १ भालुबाङमा रहेको राप्ती उद्योग वाणिज्य संघले आगामी श्रावण ३१ गते भालुवाङको नयाँ बसपार्कमा तिज गीत तथा नृत्य प्रतियोगिता आयोजना गर्न लागेको हो ।
संघको शनिवार बसेको बैठकको निर्णय अनुसार महिलाहरुको महान चार्ड हरितालिका तिजको अवसर पारेर तिज गीत तथा नृत्य प्रतियोगिता आयोजना गर्न लागिएको संघका अध्यक्ष सुरज खड्काले जानकारी दिए ।
संघले सम्पूर्ण महिलाहरूलाई कार्यक्रममा सहभागी भई तिज पर्वको उल्लास र सांस्कृतिक धरोहरलाई जगेर्ना गर्न आग्रह गरेको छ । कार्यक्रम लुम्बिनी प्रदेशको राजधानी क्षेत्रकै आकर्षक सांस्कृतिक कार्यक्रमका रूपमा विकास हुने अपेक्षा समेत गरिएको संघका अध्यक्ष सुरज खड्काले बताए ।
उक्त कार्यक्रमलाई भव्य र सभ्य बनाउने उद्देश्यले संघका अध्यक्ष सुरज खड्काको नेतृत्वमा पाँच सदस्यीय उपसमिति गठन गरिएको छ । जसको सदस्यमा बसन्त गिरी, बासुदेव न्यौपाने, मोहन आचार्य र विष्णु प्रसाद बोहरा रहेका छन् । त्यसैगरी नारायण योगीको संयोजकत्वमा ३ जना निर्णायक समिति समेत बनाईएको संघले जनाएको छ । कार्यक्रमको प्रचारप्रसारलाई प्रभावकारी बनाउन भुमी गुरुङलाई प्रचारप्रसार समिति संयोजकको जिम्मेवारी दिइएको छ भने सदस्यहरुमा शिवा थापा र सन्तमा कामी रहेका छन् ।
प्रतियोगितामा समुह दर्ताका लागि १ हजार तोकिएको छ भने प्रथम, द्धितृय, तृतिय र सान्त्वना हुने समुहलाई क्रमस २० हजार, १५ हजार, १० हजार र ५ हजार सहित प्रमाणपत्र प्रदान गरिने संघका महासचिव बासुदेव न्यौपाने बताए । प्रतियोगितामा भाग लिन चाहने समुहले श्रावण २५ गतेदेखि २९ गतेसम्म संघको कार्यालयमा नाम दर्ता गर्न सकिने महासचिव न्यौपाने जानकारी दिए ।
प्रतियोगितामा भाग लिने समुहले मौलिक कला संस्कृति झल्कन पोषाक लगाउनु पर्ने छ । साथै एक समुहमा बढीमा १० जना, बाध्यवादनका सामाग्री समुह स्वयम्ले ल्याउनु पर्ने संघले जनाएको छ ।
