नेपाली राष्ट्रिय क्रिकेट टिमका पूर्वकप्तान सन्दीप लामिछाने धरौटीमा रिहा भएका छन् । 
धरौटी बुझाएर केन्द्रीय कारागारबाट बाहिरिएका सन्दीप समर्थकबाट घेरिएका थिए । उनीलाई लिन केन्द्रीय कारागार पुगेका आफन्तसँगै सयौँ समर्थक उनलाई स्वागत गर्न जेलबाहिर जम्मा भएका थिए । सन्दीपलाई उनका आफन्तले ढाकाटोपी लगाइदिएर स्वागत गरेका थिए । 
उच्च अदालत पाटनले दिएको आदेशपछि २० लाख रुपैयाँ धरौटी बुझाएर उनी आज रिहा भएका हुन् । सन्दीपलाई धरौटीमा छोड्ने आदेश गर्दा अदालतले उनलाई विदेश जान रोक लगाएको छ भने पीडित र मुद्दाबारे कुनै सामग्री प्रकाशन गर्न वा विद्युतीय, सार्वजनिक सञ्चारमाध्यम, सामाजिक सञ्जालमा कुनै टीका–टिप्पणी गर्न पनि निषेध गरेको छ । 
बिहीबार न्यायाधीश ध्रुवराज नन्द र रमेश ढकालको इजलासले पुर्पक्षका लागि थुनामा पठाउने जिल्ला अदालत, काठमाडौंको आदेश बदर गर्दै धरौटीमा छोड्न आदेश दिएको थियो । 
