भारतीय गायन रियालिटी शो ‘सारेगमाप लिल च्याम्प्स ९’ को उपाधि जेत्सन डोना लामाले जितेकी छिन् । आइतवार राति भएको ग्राण्ड फिनालेमा सिक्किमकी ९ वर्षिया लामा विजेता घोषित भएकी हुन् ।
विजेता बनेसँगै जेत्सनले १० लाख भारतीय रुपैँया पनि पुरस्कार पाइन् । त्यसैगरी, हर्ष सिकन्दर फस्ट रनरअप र न्यानेश्वरी घाडगे सेकेन्ड रनरअप घोषित भए।फिनालेमा लामासँगै शीर्ष ६ प्रतियोगीले प्रस्तुति दिएका थिए । फिनालेमा ज्याकी श्राफ र अनु मलिक अतिथिको रुपमा पुगेका थिए ।
विजेता बनेसँगै जेत्सनले उत्साहित हुँदै भनिन्, ‘मेरो सपना साकार भएको छ । साँच्चै यो प्रतियोगिता धेरै कठिन थियो किनभने यस सिजनका सबै प्रतियोगीहरू धेरै प्रतिभाशाली थिए । सारेगमापा लिल च्याम्प्स सिजन ९ मा मेरो यात्रामा मैले धेरै कुरा सिकेको छु । म मेरा सबै सल्लाहकारहरूप्रति आभारी छु । जसले मलाई सधै साथ दिनुभयो र गायकको रूपमा मेरो क्षमता बुझ्न मद्दत गर्नुभयो । म मेरो नयाँ गायन यात्राको प्रतीक्षामा छु ।’
